ഈ ആരാധകരുടെ ഒരു കാര്യം!
ഈയൊരു കാര്യം കൂടി സൈബര് ക്രൈമിന്റെ പട്ടികയില് പെടുമോ എന്ന കടുത്ത ചര്ച്ചയിലും കൂലങ്കുഷമായ ഗവേഷണത്തിലുമാണ് സിനിമാലോകം. പ്രത്യേകിച്ച് നായികാനായകര്. പറഞ്ഞുവരുന്നത് ഫേസ്ബുക്കിലെ ഫോട്ടോ ടാഗിങ്ങിനെക്കുറിച്ചാണ്. ഒന്ന് സ്വസ്ഥമായി സ്റ്റാറ്റസ് അപ്ഡേറ്റ് ചെയ്യാനൊരുങ്ങുമ്പോഴാവും ‘വാളി’ല് ആരാധകരുടെ നെടുനീളന് ഫോട്ടോകള് ഒന്നിനു പിറകെ ഒന്നായി രംഗപ്രവേശം ചെയ്യുക. എല്ലാത്തിലും താരത്തിന്റെ പേര് ടാഗ് ചെയ്തിട്ടുമുണ്ടാവും. ചിലപ്പോള് ആരാധകന് മൃഗശാലയ്ക്കു മുന്നില് നില്ക്കുന്ന പടമാണെന്നിരിക്കട്ടെ, ടാഗ് ചെയ്യപ്പെടുന്ന താരത്തിന്റെ പേര് ചിലപ്പോള് കൂട്ടില് കിടക്കുന്ന ഹിപ്പൊപ്പൊട്ടാമസിന്റെ ദേഹത്തായിരിക്കും.
...കണ്ണ് കോഴിക്കൂട്ടില് തന്നെ!
താരങ്ങളെ ടാഗ് ചെയ്യുന്നതു വഴി കിട്ടുന്ന പേരിലും നോട്ടത്തിലുമാണ് ആരാധകന്റെ കണ്ണ്. താരങ്ങളെ കൂടാതെ സംവിധായകരെ ടാഗ് ചെയ്യുന്നതും ഒരു ഫാഷനാക്കിയവരുണ്ട്. തന്റെ ഫോട്ടോ കണ്ട് സംവിധായകന്റെ അടുത്ത ചിത്രത്തിലേക്ക് ക്ഷണം വന്നാലോ എന്ന ആകാംക്ഷയില് മലര്പ്പൊടിക്കാരന്റെ സ്വപ്നം കണ്ടുകൂട്ടാനാണ് ഇവര്ക്കിഷ്ടം. ഇതിന് പഴയതു പോലെ ഷൂട്ടിങ്ങ് ലൊക്കേഷനിലേക്ക് ഇടിച്ചു കയറുകയോ നെടുനീളന് കത്തയക്കുകയോ വെറുതെ ഫോണ് വിളിച്ച് കഷ്ടപ്പെടുകയോ ഒന്നും വേണ്ടല്ലോ. ചുമ്മാ ഫേസ് ബുക്കില് ഒരു അക്കൗണ്ട് ലോഗിന് ചെയ്യുക. വൃത്തിയും മെനയുമുള്ള ഒരു ഫോട്ടോ അപ്ലോഡ് ചെയ്യുക. പിന്നെ തന്റെ സൗന്ദര്യം കൂട്ടുകാരുടെ കമന്റിലൊതുങ്ങാതെ നാട്ടിലെ സിനിമാ രാഷ്ട്രീയ താരങ്ങള് വരെ കമന്റ് പറയാന് പാകത്തില് ടാഗ് ചെയ്യുക. ഇതു മതി!
രാഷ്ട്രീയക്കാര്ക്കും ഡിമാന്റ്
ടാഗിങ്ങില് സിനിമാതാരങ്ങള്ക്കും രാഷ്ട്രീയക്കാര്ക്കും പുറമേ, മാധ്യമപ്രവര്ത്തകര്ക്കും സാഹിത്യകാരന്മാര്ക്കും വരെയുണ്ട് മാര്ക്കറ്റ്. ടാഗിങ്ങിന് കൃത്യമായി കമന്റ് ചെയ്യുകയും നന്ദി പറയുകയും ചെയ്യുന്നവരുമുണ്ട് താരങ്ങള്ക്കിടയില്. ഇവരുടെ അഭിപ്രായത്തില്, ഫോട്ടോയ്ക്ക് കമന്റ് പറയിക്കുന്ന ആരാധകനെ അങ്ങനെയങ്ങ് കുറ്റം പറയാനും കഴിയില്ല. കാരണം, എത്ര കാലമായി അവര് താരങ്ങളെയും അവരുടെ പുത്തനന് പടവുമെല്ലാം അദ്യദിവസം തന്നെ പോയി കണ്ട് അഭിപ്രായം പറയുന്നു. ഇനി താരങ്ങളും അവരെ കണ്ടൊന്ന് അഭിപ്രായം പറയട്ടെ.
ഏതായാലും, ശൊ, ഈ ആരാധകശല്യം കൊണ്ട് ഒന്ന് ഫേസ്ബുക്കില് കയറാനും പറ്റാതായല്ലോ എന്നാണ് മല്ലു സിനിമാ ലോകത്തെ പുതിയ മേനി പറച്ചില്.
No comments:
Post a Comment