ഹോംതീയേറ്റര്
ഇനി സിനിമ കാണാന് ടിക്കറ്റ് ബുക് ചെയ്യാനായി തീയേറ്റര് നമ്പര് ഡയല് ചെയ്യാന് വരട്ടെ. ആധുനിക തീയേറ്ററിലേതു പോലെ ഏറ്റവും നല്ല ദൃശ്യചാരുതയോടെയും ശബ്ദമികവോടെയും തന്നെ നമുക്ക് സിനിമ ആസ്വദിക്കാം. അതും സ്വന്തം വീട്ടില്. പറഞ്ഞു വരുന്നത് ഹോം തീയറ്ററിനെ കുറിച്ചാണ്. സിനിമ പരിപൂര്ണ ആസ്വാദനത്തോടെയും പാട്ടുകള് ഏറ്റവും ശബ്ദസൗകുമാര്യത്തോടെയും ആസ്വദിക്കണമെന്നുള്ളവര്ക്ക് ഇനി വീട്ടിലൊരു ഹോം തീയേറ്റര് ഒരുക്കാം. അവരവരുടെ സാമ്പത്തികസ്ഥിതിയും സൗകര്യങ്ങളും അനുസരിച്ച് ഒന്നുകില് ഫാമിലി ലിവിങ്ങ് റൂമിന്റെ ഒരു ഭാഗം തന്നെ ഹോം തീയറ്റര് ആക്കുകയോ അല്ലെങ്കില് ഇതിനായി പ്രത്യേകം മുറി സജ്ജീകരിക്കുകയോ ചെയ്യാം.
ഹോതീയേറ്ററെന്നാല്...
ഹോംതീയേറ്റര് എന്നാല് ഡിവിഡി, സബ്വൂഫര്, സ്പീക്കറുകള് എന്നിവയുടെ സെറ്റിനെയാണ് വിശേഷിപ്പിക്കുന്നത്. ഇതിനെ ടിവിയുമായി ബന്ധിപ്പിക്കാം. വ്യത്യസ്ത ഔട്ട് പുട്ടുകളുള്ള ഹോംതീയറ്ററുകള് ലഭ്യമാണ്. 5.1 , 6.2, 7.1 എന്നിങ്ങനെ വിവിധ മോഡലുകളില്, ഹോം തീയേറ്റര് ലഭിക്കും. ഡിവിഡി, 5 സ്പീക്കര്, ഒരു സബ്വൂഫര് എന്നിവ അടങ്ങിയതാണ് 5.1 മോഡല്.
പൊസിഷന് പ്രധാനം
ഹോം തീയേറ്ററിന്റെ വലിപ്പം, ഉപയോഗിക്കുന്ന സാമഗ്രികള് എന്നിവ പോലെ ഇവ വയ്ക്കുന്ന പൊസിഷനും പ്രധാനമാണ്. വോള് മൗണ്ടഡ് സ്പീക്കറുകളാണ് വയ്ക്കുന്നതെങ്കില് അവയുടെ പൊസിഷന് മനസിലാക്കി ഭിത്തിയില് തന്നെ എട്ടോ പത്തോ സെ മീ കനത്തില് ഡിപ് നല്കിയാല് സ്പീക്കര് പുറത്തേക്ക് കാണാത്ത വിധം വയ്ക്കാനാവും. തള്ളിനില്ക്കുമ്പോഴുള്ള അരോചകവും ഒഴിവാക്കാം. ലിവിങ് റൂമിലോ മറ്റോ ടിവിയോട് ചേര്ന്നാണ് ഹോം തീയേറ്റര് ഒരുക്കുന്നതെങ്കില് സ്പീക്കര് നല്കാനുള്ള പൊസിഷന് ആദ്യം തന്നെ മനസില് കാണണം. ടി വിയുടെ പ്ലഗ് പോയിന്റിനൊപ്പം അഡീഷനലായി ഡിവിഡിയ്ക്കു വേണ്ടി ഒരു സോക്കറ്റ് കൂടി നല്കാം. ഭിത്തിയില് വയ്ക്കുന്നതിനു പകരമായി നിലത്തുവയ്ക്കുന്ന തരം ടവര് സ്പീക്കറുകളും ഇപ്പോള് ലഭ്യമാണ്.
ടവര് സ്പീക്കറാണ് ഉപയോഗിക്കുന്നതെങ്കില് അതിനുള്ള സൗകര്യങ്ങള് ഫ്ളോറിങ് ചെയ്യുമ്പോള് തന്നെ ചെയ്യണം. ഭിത്തി പ്ലാസ്റ്റര് ചെയ്യുന്നതിനു മുമ്പ് തന്നെ വയറിങ് നടത്തണം. കണ്സീല്ഡ് രീതിയിലുള്ള വയറിങ് നടത്താന് ശ്രദ്ധിക്കാം.
പ്ലാനിങില് ശ്രദ്ധിക്കണം
ഹോം തീയേറ്റര് വയ്ക്കുന്ന മുറിയുടെ നീളം, വീതി എന്നിവ തമ്മിലുള്ള അനുപാതം പ്രധാനമാണ്. വെളിച്ചം, ശബ്ദം എന്നിവയെ ആവശ്യത്തിനനുസരിച്ച് നിയന്ത്രിക്കുന്നതാവണം മുറിയുടെ നിര്മാണരീതി. ഡിജിറ്റല് ശബ്ദവിന്യാസം കൃത്യമായി ആസ്വദിക്കാന് ഒരു പ്രത്യേകമുറി തന്നെ ഹോംതീയേറ്റര് ആക്കുന്നതാണ് നല്ലത്. സ്ലോപ് റൂഫാണ് മുറിക്കെങ്കില് ശബ്ദപ്രതിഫലനം വേണ്ട വിധത്തില് നല്കാന് പ്ലാനിങ്ങില് തന്നെ ശ്രദ്ധിക്കണം.
സ്പീക്കറിനു എതിര്വശത്തെ ഭിത്തിയില് ശബ്ദപ്രതിഫലനത്തിനു ടെക്സ്ചര് ഇഫക്ട് നല്കാം. ടൈല്, മാര്ബിള് എന്നിവ ശബ്ദത്തെ കൂടുതലായി പ്രതിഫലിപ്പിക്കുന്നതിനാല് വുഡന് ഫ്ളോറിങാണു അനുയോജ്യം. വലിയ ജനലുകള് നല്കാതെ അത്യാവശ്യം മാത്രം വെന്റിലേഷന് നല്കാം. ശബ്ദം പ്രതിഫലിക്കുന്ന തരം സ്റ്റീല് ഫര്ണിച്ചറും മറ്റും ഒഴിവാക്കി പകരം ബീന് ബാഗ് പോലെയുള്ളതോ തടി കൊണ്ടുള്ളതോ ആയ ഫര്ണിച്ചര് ഉപയോഗിക്കാം.
No comments:
Post a Comment