ഒടുവില് ഐശ്വര്യയും!
ഒടുവില് അതും സംഭവിച്ചു. ഐശ്വര്യ റായി ഗര്ഭിണിയായി! വിവരമറിഞ്ഞ അന്നുമുതല് അഭിനന്ദനപ്രവാഹങ്ങള്ക്കു ചുറ്റുമാണ് ഐശ്വര്യയും ബച്ചന് കുടുംബവുമല്ലാം. മുന്കാമുകന് സല്മാന് ഖാന് തൊട്ട് ബോളിവുഡിലെ ഇളമുറക്കാരായ ദീപിക പദുക്കോണും ഫര്ഹാന് അക്തറും വരെയുണ്ട് ആശംസകള് നേരാന് തിടുക്കം കൂട്ടുന്നവരില്. ഐശ്വര്യ തങ്ങളിലൊരാളാവാന് പോവുന്നതിന്റെ സന്തോഷം ബോളിവുഡിലെ പ്രശസ്തരും ഐശ്വര്യയുടെ സമകാലീകരുമായ യുവ അമ്മനടിമാരും മറച്ചു വെക്കുന്നില്ല. ഇതിനിടെ ആശംസകളര്പ്പിച്ച് മുന് കാമുകന് സല്മാന് ഖാന് എത്തിയതും ശ്രദ്ധേയമായി. ആദ്യമായി മുത്തച്ഛനും പിന്നെ അഭിയാഷിനും സ്നേഹം നിറഞ്ഞ ആശംസകള് അര്പ്പിച്ചുകൊണ്ടാണ് കക്ഷിയുടെ ട്വീറ്റ്. ഒരുകാലത്ത് ഏറ്റവും ആഘോഷിക്കപ്പെട്ടതും വിവാദവുമായിരുന്നു ഇരുവരുടേയും പ്രണയകാലത്തെപ്പറ്റിയുള്ള ഓര്മ്മകളുടെ ലാഞ്ചന പോലുമില്ല സല്മാന്റെ വാക്കുകളില്. ‘പാവം പയ്യന്, ഒരാള്ക്ക് ഇത്രയൊക്കെ നന്നാവാന് കഴിയുമോ’ എന്നാണ് ഈ ട്വീറ്റ് വായിച്ചതു മുതല് ബോളിവുഡിലെ അണിയറñസംസാരം. ആശംസകളര്പ്പിച്ചവരില് പിന്നെ ശ്രദ്ധേയമായത് എന്നും വിവാദങ്ങളുടെ കളിത്തോഴനായ സംവിധായകന് രാംഗോപാല് വര്മയുടെ ട്വീറ്റാണ്. കക്ഷിയുടെ ട്വീറ്റ് ഇങ്ങനെ പോവുന്നു: ‘ഐശ്വര്യ ഗര്ഭിണിയായതു ശരി തന്നെ. സല്മാന് ഖാന് പോലും ഐശ്വര്യയ്ക്ക് ആശംസകള് അര്പ്പിക്കുന്നുമുണ്ട്. പക്ഷേ, എന്നെ സംബന്ധിച്ചിടത്തോളം സുന്ദരികളായ സ്ത്രീകള് ഗര്ഭിണികളാവുന്നത് ഞാന് ഇഷ്ടപ്പെടുന്നില്ല. അത് ഐശ്വര്യയാവുമ്പോള് പ്രത്യേകിച്ച്. എങ്കിലും ഈ സമയം അഭിഷേകിനെയോര്ത്ത് ഇളവ് നല്കുന്നു.’
കാത്തുകാത്തിരുന്ന കുഞ്ഞിക്കാല്
ഇനിയെങ്കിലും ഐശ്വര്യയുടെ ഗര്ഭത്തെക്കുറിച്ചും കുട്ടികളുണ്ടാകാത്തതിനെക്കുറിച്ചും ചോദിക്കുമ്പോള് അഭിഷേക്, ഐഡിയ പരസ്യത്തിലുള്ളതു പോലെ ‘നോ ഐഡിയ’ എന്നു പറയില്ലല്ലോ. വാര്ത്തയ്ക്കു കിട്ടിയ പ്രാധാന്യവും ജനശ്രദ്ധയും നോക്കുകയാണെങ്കില് രാജ്യത്തെ ഏറ്റവും പ്രശസ്തനായ കുഞ്ഞായി അഭി-ആഷ് ദമ്പതികളുടെ കുഞ്ഞ് പിറന്നു വീഴും. ചില വാര്ത്താ ചാനലുകള് ഇതിനു നല്കിയ പ്രാധാന്യം അണ്ണാ ഹസാരെയുടേയും ബാബാ രാംദേവിന്റെയും ഉപവാസത്തിനേക്കാളേറെ. മുഖ്യവാര്ത്തകള്ക്കിടയിലും ബിസിനസ് വാര്ത്തകള്ക്കിടയിലും എന്തിനേറെ, സ്പോര്ട്സ് വാര്ത്തകള്ക്കിടയില് വരെ ഇതു ചര്ച്ച ചെയ്യപ്പെട്ടു കഴിഞ്ഞു. ഐശ്വര്യയുടെ ഗര്ഭത്തെക്കുറിച്ചുള്ള അഭ്യൂഹങ്ങള്ക്കു വിരാമമിട്ടു കൊണ്ട് സാക്ഷാല് ബിഗ് ബി അമിതാഭ് ബച്ചന് തന്നെയാണ് ആദ്യമായി മരുമകള് ഗര്ഭിണിയാണെന്ന വാര്ത്ത പുറംലോകത്തോടു ട്വീറ്റ് ചെയ്തത്. കാത്തു കാത്തിരുന്ന് ഒടുവില് കുടുംബത്തിലേക്ക് ഒരു കുഞ്ഞിക്കാല് വരാന് പോവുന്നതിന്റെ സന്തോഷത്തിലാണ് സീനിയര് ബച്ചന്.
ഐശ്വര്യയ്ക്ക് ഇരട്ടക്കുട്ടികളെന്ന്
ഇതിനിടെ, മുംബൈയിലെ ജ്യോതിഷിമാര് കുട്ടിയുടെ ജാതകവും ഇപ്പോഴേ കുറിച്ചുതുടങ്ങിയിരിക്കുന്നു. പ്രശസ്ത ജ്യോതിഷിയായ പഹത് സാംഗ്വിയുടെ അഭിപ്രായത്തില് ഐശ്വര്യയ്ക്കു ജനിക്കാന് പോവുന്നത് ഒന്നുകില് ഇരട്ടക്കുട്ടികളോ അല്ലെങ്കില് പെണ്കുട്ടിയോ ആവുമത്രേ. സംഖ്യാശാസ്ത്രപ്രകാരം ഐശ്വര്യയുടേയും അഭിയുടേയും സംഖ്യ അഞ്ച് ആണ്. അതിനാല് ഇരട്ടക്കുഞ്ഞുങ്ങള് ജനിക്കാനാണത്രേ സാധ്യത കൂടുതല്.
ഏതായാലും കല്യാണം കഴിഞ്ഞ അന്നുതൊട്ട് ഐശ്വര്യയുടെ പിന്നാലെ കൂടിയ പപ്പരാസിക്കൂട്ടങ്ങള്ക്ക് കുഞ്ഞു ജനിക്കുന്നതു വരെയെങ്കിലും വിശ്രമിക്കാം. ഇടയ്ക്കു, രാവണ് സിനിമയുടെ ഷൂട്ടിങ്ങിനിടയ്ക്ക്, തുടര്ച്ചയായി ഐശ്വര്യയുടെ ഗര്ഭവാര്ത്തകള് മാധ്യമങ്ങള് ചികയുന്നതില് ബച്ചന് കുടുംബം ഒന്നടങ്കം ബ്ലോഗിലൂടെയും മറ്റും ശക്തമായി പ്രതിഷേധിച്ചിരുന്നു.
No comments:
Post a Comment