അണ്ണായും സിനിമായും
ഇടയ്ക്ക് സീ ടി വിയുടെ റിയാലിറ്റി ഷോയില് ജഡ്ജിയായതൊഴിച്ച് അണ്ണ ഹസാരെയ്ക്ക് പ്രകടമായ ബോളിവുഡ് ബന്ധങ്ങളൊന്നുമുണ്ടാവാന് വഴിയില്ല. എങ്കിലും സിനിമാലോകം ഒന്നടങ്കം അണ്ണയെ ഒരു സൂപ്പര് സ്റ്റാറായി കണക്കാക്കിയ മട്ടാണ്. അണ്ണാ ഹസാരെയ്ക്ക് പിന്തുണ നല്കാനും അനുകൂല പ്രസ്താവന ഇറക്കാനും കച്ച കെട്ടിയിറങ്ങിയിരിക്കുകയാണ് ചെറുതും വലുതുമായ ബോളിവുഡ്, കോളിവുഡ് താരങ്ങളെല്ലാം. അണ്ണാ ഹസാരെയുടെ സമരപന്തലിന് ഒഴിച്ചുകൂടാന് പറ്റാത്തതാവട്ടെ ബോളിവുഡ് സൂപ്പര് ഹിറ്റ് ദേശഭക്തിഗാനങ്ങളും. അണ്ണ ഹസാരെ ഒരു ബ്രാന്ഡ് ആയെന്നു തന്നെ സാരം. അഴിമതി ഇല്ലാതാക്കാന് അണ്ണയുടെ കരങ്ങള്ക്ക് പിന്തുണ പ്രഖ്യാപിക്കാനാണ് മാദകനടി ബിപാഷ ബസുവിന്റെ ആഹ്വാനം. ഇത്രയൊക്കെ ആയിട്ടും സുപ്രീം കോടതി ഈ പ്രശ്നത്തില് ഇടപെടാത്തതെന്തെന്നാണ് തെന്നിന്ത്യന് ഹീറോ മാഡി മാധവന്റെ ചോദ്യം. ഇവരെക്കൂടാതെ ത്രിഷ, ദിയ മര്സ, ഫര്ഹാന് അക്തര്, ശബാന ആസ്മി, അനുരാഗ് കശ്യപ്, ജാവേദ് അക്തര്, അനൂപം ഖേര് തുടങ്ങിയവരെല്ലാം അണ്ണാ ഹസരേയ്ക്ക് ശക്തമായ പിന്തുണ പ്രഖ്യാപിച്ചവരില് ഉണ്ട്. ഇതു കൂടാതെ സ്റ്റൈല് മന്നന് സാക്ഷാല് രജനീകാന്തും സൂര്യയും ചേരനും അടക്കമുള്ളവരും അണ്ണാ ഹസാരെയ്ക്ക് പിന്തുണ പ്രഖ്യാപിച്ചുണ്ട്. സൂര്യയും മറ്റ് താരങ്ങളും ഇതിനിടെ പ്രതീകാത്മകമായി കഴിഞ്ഞ ദിവസം പ്രതീകാത്മക ഉപവാസവും ഇരുന്നു.
വന്ദേ മാതരവും ഇങ്ക്വിലാബ് സിന്ദാബാദും കഴിഞ്ഞാല് രംഗ് ദേബസന്ദിയാണ് സമരപ്പന്തലിലെ ഫേവറിറ്റ് ഗാനം. സമരപ്പന്തലിലെ മറ്റൊരു കാഴ്ച ഐ ആം അണ്ണാ ഹസാരെ എന്നെഴുതിയ ടീ ഷര്ട്ടുകളാണ്. ഒരുപക്ഷേ, ഏതൊരു ബോളിവുഡ് താരത്തേക്കാളും ആരാധകരുള്ള ആളായി അണ്ണാ മാറിയോ എന്നാണ് ബോളിവുഡിലെ അസൂയാലുക്കളുടെ പുതിയ താരതമ്യപഠനം. ഷാരൂഖിനോ സല്മാനോ പോലും ടീഷര്ട്ട് വിപണിയെ ഇത്രത്തോളം സ്വാധീനം ചെലുത്താന് കഴിഞ്ഞതായി അറിവില്ല. കൂടാതെ ഐ വാണ്ട് ടു ബി അറസ്റ്റഡ്, വി ആര് ഫൈറ്റിങ് ഫോര് സെക്കന്റ് ഫ്രീഡം തുടങ്ങിയ ടീ ഷര്ട്ടുകളും സമരപ്പന്തലിലെ സ്ഥിരം ടീ ഷര്ട്ടുകളില് സ്ഥാനം പിടിച്ചിട്ടുണ്ട്.
No comments:
Post a Comment